ბილ გეითსის თქმით, ხელოვნური ინტელექტის ეპოქაში გადასვლა კაცობრიობის ისტორიაში ერთ-ერთ ყველაზე ტურბულენტურ პერიოდად ჩაითვლება და მისი მართვის სანდო გეგმა ჯერ არავის წარუდგენია.

ბილ გეითსმა ოთხშაბათს გააფრთხილა საზოგადოება, რომ მსოფლიო სახიფათოდ მოუმზადებელია იმ რყევებისთვის, რაც ხელოვნურ ინტელექტს მოაქვს — ტექნოლოგიას, რომელიც ანადგურებს სამუშაო ადგილებს და საფრთხეს უქმნის ადამიანურ ურთიერთობებს, განსაკუთრებით ახალგაზრდებისთვის.

თავის ბლოგზე გამოქვეყნებულ თითქმის 6000-სიტყვიან ესეში Microsoft-ის თანადამფუძნებელმა აღნიშნა, რომ ხელოვნური ინტელექტის ეპოქაში გადასვლა კაცობრიობის ისტორიაში ერთ-ერთ ყველაზე ტურბულენტურ პერიოდად ჩაითვლება და რომ ამ პროცესის მართვის სანდო გეგმა ჯერ არავის შეუმუშავებია.

მისმა პოზიციამ, სავარაუდოდ, სერიოზული უკმაყოფილება გამოიწვიოს სილიკონის ველის წარმომადგენლებსა და ტრამპის ადმინისტრაციაში, რომლებიც ტექნოლოგიური ლიდერების ნაწილის „აპოკალიპტურ“ განწყობებს ხელოვნური ინტელექტის რევოლუციისთვის რეპუტაციის შელახვაში ადანაშაულებენ.

„ხელოვნური ინტელექტი იქნება ან ოდესმე შექმნილი ყველაზე დიდი გათანაბრებელი, ან უსამართლობის ყველაზე უარესი წყარო“, — დაწერა 70 წლის გეითსმა, რომელიც ახლა თავისივე სახელობის საქველმოქმედო ფონდს ხელმძღვანელობს.

„არ არსებობს გეგმა, რომელიც ხელოვნური ინტელექტის ეპოქაში შესვლას შეამსუბუქებს“, — თქვა გეითსმა და დასძინა, რომ ასეთი გეგმის არსებობის შემთხვევაში მას მხარს დაუჭერდა.

„თუმცა, არ ვფიქრობ, რომ ეს მოხდება. გეოპოლიტიკური და ეკონომიკური სტიმულები იმდენად ძლიერია, რომ პროცესი სრული სიჩქარით მიდის წინ“, — გააფრთხილა მან საზოგადოება.

გეითსის თქმით, მან ხელოვნური ინტელექტის სწრაფი დანერგვით გამოწვეული სამი ძირითადი რისკი დაინახა.

პირველი — სამუშაო ადგილების სამუდამო განადგურებაა. გეითსმა ხაზგასმით აღნიშნა, რომ ამ პროცესის შედარება სოფლის მეურნეობიდან ოფისებში გადასვლასთან შეცდომაში შემყვანია, რადგან ის ტრანსფორმაცია თაობების განმავლობაში მიმდინარეობდა და ქმნიდა ისეთ პოზიციებს, რომლებიც მაინც მოითხოვდა ადამიანის აზროვნებას.

ხელოვნურ ინტელექტს შეუძლია ჩაანაცვლოს თვითონ აზროვნება, გააფრთხილა მან და აღნიშნა, რომ დაახლოებით ერთ დეკადაში ეს დარტყმას მიაყენებს სამართალს, მედიცინას, მომხმარებელთა მომსახურებას, პროგრამულ უზრუნველყოფასა და წარმოებას.

საწყისი და საშუალო დონის პოზიციები ყველაზე მეტად არის რისკის ქვეშ, თქვა გეითსმა, რაც შრომის ბაზარზე შესულ ახალგაზრდებს გაცილებით ნაკლებ ვაკანსიას უტოვებს.

მუშათა კლასის პროფესიები (Blue-collar) მომდევნო იქნება, რადგან რობოტები გაიაფდება, ხოლო მშენებლობისა და სასტუმრო მომსახურების სექტორები გავლენას ათწლეულის ბოლოსთვის იგრძნობენ.

გეითსმა წამოაყენა იდეა, რომ ზოგიერთი სამუშაო ადგილი სპეციალურად ადამიანებისთვის უნდა იყოს გამოყოფილი, იმ შემთხვევაშიც კი, თუ ხელოვნურ ინტელექტს მათი გაკეთება უკეთესად და იაფად შეუძლია.

მეორე რისკი არის ის, რომ ხელოვნური ინტელექტი ახალ შესაძლებლობებს აძლევს ბოროტმოქმედებს.

გეითსის თქმით, მისი ნაცნობი კიბერუსაფრთხოების სპეციალისტები შეშფოთებულნი არიან იმით, რომ თავდამსხმელები უფრო სწრაფად ვითარდებიან, ვიდრე დამცველები ასწრებენ სუსტი ადგილების აღმოფხვრას.

საავადმყოფოები, ბანკები, წყალმომარაგების სისტემები და ელექტროქსელები — ეს ყველაფერი დარტყმის ქვეშაა, თქვა მან.

რისკის მესამე სფერო ეხება ბავშვებსა და ადამიანურ ურთიერთობებს.

კვლევებზე დაყრდნობით, გეითსმა აღნიშნა, რომ AI ჩატბოტები, რომლებიც მომხმარებლებს არასდროს ეწინააღმდეგებიან და არ აბრაზებენ, დამოკიდებულების გამომწვევი ხდება და ადამიანებს სოციალური უნარების განვითარების შესაძლებლობას ართმევს.

ხელოვნური ინტელექტის ბოტები „გვპარავენ გაკვეთილებს, რომლებსაც სხვა ადამიანებთან ურთიერთობით ვსწავლობთ“, — დაწერა მან.

გეითსმა აღიარა, რომ მას ჯერ კიდევ აქვს მჭიდრო ფინანსური კავშირები ტექნოლოგიურ ინდუსტრიასთან და აღნიშნა, რომ საინვესტიციო მოგება მოხმარდება მის ფონდს, რომელიც მომდევნო ორი ათწლეულის განმავლობაში დარჩენილი 200 მილიარდი დოლარის დახარჯვას გეგმავს.

ეს ესე გამოქვეყნდა მას შემდეგ, რაც რამდენიმე თვის წინ გეითსს წარმომადგენელთა პალატის ზედამხედველობის კომიტეტში დაკითხვა ჩაუტარდა გარდაცვლილ სექსუალურ დამნაშავესთან, ჯეფრი ეპშტეინთან მისი კავშირების გამო. ივნისში მან კანონმდებლებს განუცხადა, რომ ეს ურთიერთობა „მსჯელობისას დაშვებული სერიოზული შეცდომა“ იყო.